Mesaz Sef Egzekitif Alokazyon Lazournen Enternasyonal Pour Akse Iniversel Avek Lenformasyon 2026

Lazournen Enternasyonal pour Akse Iniversel avek Lenformasyon i en lokazyon enportan pour reflesir lo valer lenformasyon dan nou sosyete e lo drwa sak dimoun pour ganny akse avek lenformasyon.

Akse avek lenformasyon i plis ki zis ganny bann dokiman oubyen larepons. I permet dimoun konpran pli byen bann size ki annan en lefe lo zot lavi, enterakte avek bann antite piblik e partisip dan devlopman zot pei.

Dan Sesel, Lalwa Akse avek Lenformasyon, 2018 i donn lefe sa drwa enportan e i met responsabilite lo bann antite piblik pour donn akse avek lenformasyon e pour proaktivman fer lenformasyon ki dan lentere piblik disponib.

Komisyon Lenformasyon i annan en rol enportan pour fer sir ki sa drwa i ganny respekte e soutenir. Konman en lenstitisyon endepandan, Komisyon i travay pour promot respe pour Lalwa, ranforsi transparans dan bann antite piblik e fer sir ki manm piblik i annan en landrwa pour zot kapab ale ler zot drwa pour ganny akse avek lenformasyon pa’n ganny respekte.

Sa travay i enportan akoz akse avek lenformasyon i ranforsi relasyon ant bann antite piblik ek dimoun ki zot servi. Ler lenformasyon i aksesib, dimoun i pli kapab konpran bann desizyon piblik, demann kestyon e partisip dan bann size ki dan lentere piblik.

Panda bann lannen ki’n pase, nou’n vwar en pli gran konsyans lo drwa pour ganny akse avek lenformasyon e bann zefor kontinyel par bann antite piblik pour zwenn zot lobligasyon anba Lalwa. Nou rekonnet kontribisyon bann Zofisye Lenformasyon, Sef bann antite piblik e tou bann ki travay pour fer lenformasyon pli aksesib pour piblik.

Me, i ankor annan travay pour fer. Vre valer drwa pour ganny akse avek lenformasyon i ganny vwar ler i vin en parti lavi toulezour dan relasyon ant piblik ek bann antite piblik. Sa i demann en langazman kontinyel pour ranforsi en kiltir bon gouvernans a traver transparans ek rann kont.

Anmezir ki nou komemor sa lazournen enportan, annou kontinyen rekonnet akse avek lenformasyon konman en drwa ki pour tou dimoun e konman en parti enportan dan en bon servis piblik.

Annou osi kontinyen travay ansanm pour fer sir ki bann prensip Lalwa Akse avek Lenformasyon i ganny reflekte pa zis dan nou lalwa, me osi dan lafason ki lenformasyon i ganny fer disponib e dan lafason ki nou servi pep Seselwa.

Bon Lazournen Enternasyonal pour Akse Iniversel avek Lenformasyon.

Diana Benoit
Sef Egzekitif